دى القصيدة الى محمد وديع كتبها بعد ما تم القبض عليه فى نص الليل لما رجع من التحرير
بتحكى ايه الى حصله اثناء القبض عليه و التحقيق معاه
بس روووووعه انا كنت بصوت لما سمعتها
وقلت لازم احتفظ بيها هنا عالمدونة و هو مش حيقول حاجة :P
بجد دمـــاغه دى ديناميــــــــــــــــــــــت
اسيبكم مع القصيدة بقا
مكلبيشني ومعصبين عينيا ليه؟
فارس وقالبيني زليل
خاين أنا ولا عميل؟
كل اللي دار جوايا حركني
ام الشهيد كانت بتبكي وبكاها كان زي العويل
نازل باقول ماتحزنيش إبنك أخويا ودمه دمي
منا برضو مصري والهم همي
ومن النهارده أنا زي إبنك وانتي برضو زي أمي
يا ام الشهيد من غير بكا من غير مواجع... إبنك خلاص هاخد عزاه وبتاره راجع
من كل ظالم من كل فاسد من كل فاتن بين الكنايس والجوامع
فجأه لقيت نفسي أنا خاين وثاير للفتن
خاين وثاير للفتن !!؟ خاين لمين؟؟؟
خاين انا لدم الشهيد؟؟؟ طب ما تقولولنا مين اللي قتله وهو فين
ثاير فتن بين مين ومين؟
بين الصفوف وللا لناس قاطعين ودانهم من جبنهم متجمدين
خاين وثاير للفتن؟
دنا اللي عاشق الوطن
دنا عيشت باحلم بيوم هاييجي واضحي فيه وافدي بروحي وقت المحن
خاين وثاير للفتن؟
ميت إتهام من غير دليل وويلي أصبح الف ويل
وانا اللي دمي كان نهر نيل عاشق لبلدي وعشانها اعمل المستحيل
إبكي يا عين وإنزف يا دمع علي اللي ضاع من غير سبيل
مكلبيشني ومعصبين عينيا ليه؟ فارس وقالبني زليل! خاين انا ولا عميل ؟!؟
داخلين عليا في نص ليلي رافعين بنادق ومسدسات
إرهابي انا وللا بتاجر في مخدرات
ومكفكوش...
عايزين كمان تجرجروني علي بره وانا حافي
ومسدساتكم في صدري وفاكريني واد فافي
راح اكون كده مرعوب ؟
لا يا امي ماتخافي... ماتخافي دا ابنك ولد فارس... ماكانش جبان
يتمني يستشهد ف الحرب ف الميدان
وبلاش دموع دا ابنك فرحان ومش حزنان
بس اللي جنني بضحك في وشه واقول له عارفك وجاي معاك
البس حاجه في رجلي قاطع ودانه عداك
ابويا كان عالباب قال لهم خدوه إشنقوه إعدموه بس يلبس
لكن إبني مش هاينزل والجيران كده يشوفوه
قام عبيط زعق لابويا... إيه ؟ فاكرو يكون مخضوض ؟
يا غبي دا ف وقت حربك كان بطل داس ودبح ف اليهود
لو بتلمح كنت تلمح صوره ليه بنوط الشجاعه
وانت لسه في علم غيبك أو يادوب ترضع رضاعه
زقهم وراح مزعق كله هدا ما حد طول
قاللي إلبس روحت لابس... طب ما قلنا كدا مالأول
وقمت نازل في حراسه مشدده وقمت راكب ميكروباس قبله جيب وبعده جيب
أصلي بن لادن خلاص
وكلبشوني وغمموني رغم إني كنت عارف المكان
جنب بيتنا ولسه من كام شهر كان ...رحت فيه واستجوبوني
وجابو صوري وطلعوني ع الشاشات ظابط وسيئ السلوك وبتاع بنات
ظابط وسيئ السلوك وبتاع بنات !!! ؟؟ طب ماتجيبولنا الإثباتات
تلات سنين كليه فاتو وملفي أبيض م البياض وسته بره ما شوفت فيهم يوم جزا
عايش في حالي من سكات
ولما يوم زهقت فضفضت في قصيده قالو لأ ...خطر... دا قلبه مات
يحاكمني بيها واطلعلو بعديها بطل يبقي إتهطل
قال لأ... تعالي... دا نت ليك صور بليبس ميري ع النت شبكة المعلومات م السيل وفرقه وتدريبات
يا اخونا من 2001 والسيل عليه وكنت انا ف المدرسه ما اعرفش شكل الميري إيه
فجأه لقيت نفسي خلاص ف المحكمه
والقاضي مستغرب
يقولي إيه يا ابني كل اللي علي صدرك وفوق جيوبك
سيل ، مقاومة إرهاب ، ضفادع بشريه
لما انت شاطر طب إيه اللي جابك هنا !؟
وقفت بضحك قلتله انت بتسألني انا؟؟؟
سكت وقاللي معلش يا ابني الحكم مش من عندنا
الحكم مش من عندنا !!!؟
احكم يا قاضي حكمي و كاتبه ربنا
والحكم كان بالحبس عام
اربع شهور وخرجوني واسبوعين تلاته والرابع جابوني
بس الشهاده لله بجد ف المره دي أكرموني
زنزانه متر في متر رمييني فيها ع البلاط
والأكل أااه تقولش كلب باعطف عليه كده بالفوتات
ومن الغباء إنك تفكر القسوه بتولد سكات
القسوه بتولد ضياع
يبقالي إيه؟؟ مستقبلي وهايبقي ضاع
مركب بقت من غير شراع
والدبله خارجه من بين صوابعي منزوعه نزاع
يعني هي جت عليكي يا حبيبتي ما الكل باع
بس اعذروني لو اتولد جوايا إحساس بإنتقام والحاجه ام الإختراع
لكن السكات بيتولد بالإحتواء
بدواء لداء مش بالعداء ولا بالكلام ولا بالعقاب ولا بالألام ولا بالإعدام
ما تفكرو ولو للحظه نزلت ليه ؟؟؟عميل لدوله أجنبيه ؟؟؟
ولا في شيئ ساكت عليه وسكاتي وصل الإنفجار
الإنفجار بكلام ومش دم ودمار
لا فإيدي مدفع ...
ولا تحت مني دبابه تهدم الإنتصار.
ليست هناك تعليقات:
إرسال تعليق