ياصباح الفل والخير والأطمئنان والصدق
ياصباح الحضاره والاخلاق الكريمه والمشاعر الطيبه
صباح بلا فتنه ولا سرقه ولا سخافه ولا نطاعه ولا مبارك ولا اعوانه ولافساد فالارض
الله يخرب بيوتهم وبيوت اهاليهم ياااااااااااااااااااااااااااااااااااااااااااااااااااااارب
لساني طويل انا لازم اقل ادبي مش عارفه اكمل الصباح عدل للاخر لازم اهرتل
المهم يعني صباح الخير حلوه صوره الهرم دي صح؟؟؟
عجبتني لاني لاقيت صوره الهلال والصليب اللي جوا علم مصر والشغل ده مستهلكه تماما
وانا بادور علي صوره للوطن مصر الجميله الموزه اللي هاترجع قمر تاني
وعجبتني دي بقا
آهو هو ده الكلام
منظر من قلب الواقع كل شارع في مصر لازم يبقا فيه المنظر ده
مما وجه تفكيري لحاجه كده !!!!
هما العالم بتوع الفتن ايا كانو مين مش دي قصتنا دلوقتي
ايه اللي بيخلي الفتنه تشعلل وتتأجج (جامده اوي تتأجج دي) عارفين ايه
نوعين من البشر الحمقي اللي ربنا يحرقهم بجاز
اولا العالم الجاهله الغبيه اللي بايعه مخها ومالياه زباله ولابسالي جلابيه الا ربع وبينادوهم ياشيخ يا شيخ
واحب اقولهم يا شيخ فكنا قرفتو اللي خلفونا انا المشايخ اللي اعرفهم بيبقو درسو ازهر لما طلع عين اللي خلفوهم وحفظو القرآن كله
ودرسو فقه وشريعه ومذاهب الأئمه الاربعه مع المقارنه بينهم ويالهوووووووووووووووووووووي بيكونو ياعيني اتخرجو من الازهر دماغهم متكلفه زي ما بيقولو يعني مش فاضيين للهرتله بتاعه مشايخ الجلابيه الاربع
والغريب فالموضوع تلاقي مشايخ الجلابيه اللي سبق ذكرهم متحليين بورع ظاهري غريب ولو سألت واحد منهم فالفقه هتلاقيه بلاطه...طوبه..دومه
يبقا ايه بقا ..اسكت احسن صـــح لاني احاول التحلي بالاخلاق الحميده
ثاني نوع بقا الا وهم الشباب السيس مرتادي الكنيسه للمعاكسه &have funوليس للقداس او الاعتراف او المناوله
ودول بقا تلاقيهم ايه بيعاملو الصليب معامله تاتو الجي سترينج بالضبط تلاقي الواحد من دول مغرق لك نفسه صلبان
واذا خدت واحد علي جنب كده وقلتله ياحبيبي ايه الفرق بين انجيل متي وانجيل مرقس وهو الانجيل الثاني في تسلسل الاناجيل الاربعه ولا ماتدينا ترنيمه كده ل ليديا شديد ولا عادل ماهر او قولي مثلا ايه الفرق بين الارثوذكس والأنجليين مثلا
هتلاقيه تنح ويقولك الأنجليين دول احنا مابنحبهمش ونقطه ومن اول السطر
يعني برضو تبع حزب البلاطه والطوبـــه والدومـــــــه
وغالبا الصنفين السابقين دول من المسلميين والمسيحيين هما اللي بيظيطو فالظيطه وبيولعوها علي اي مشكله بتحصل وهما فالنهايه
لافاهمين حاجه ولا عارفين حاجه وهما دول برضو اللي كان منهم اللي شايلين يافطه عاوزه اختي عشان يرجعو كامليا شحاته واللي كانو شايلين الصليب اللي خشبتين بوص عند ماسبيرو
احب اقول للاشكال النيله دي من مسلمين ومسيحيين ارحمو شعب اللي خلفونا
انتو لو عليكو بتتساوي الديمقراطيه بالملوخيه لأنكم فالنهايه عدد وخلاص محسوبين علي مصر وانتوكائنات مستهلكه وخلاص
وكتكو 60نيله لاء كتكو 60 الف نيله
مش هاتفاخر واتقايم عليكو وابتدي احلل النسيج الوطني المصري اللي هو فتله مسلم وفتله مسيحي لاء هاقولكو موتو بغيظم والله ثم والله و(صـــــــــــــــدقوني) ولا هاتنولو اللي في بالكو ولا فالحلم
بغض النظر بقا اللي محرككو فلول ولا اي نيله اه والكلام للكل
مش هاتنولوها ... اصل مصر دي ربنا راضي عنها
مصر دي اتذكرت فالقرآن كذا مره
مصر دي سيدنا ابراهيم وسيدنا يوسف وستنا مريم وسيدنا عيسي والفاطميين ويوووووووووووووووووووووووه اقول ايه بس ولا ايه
واقول لكم مقولتي الشهيره
كل واحد فيكم يخليه في كوزو وعمرنا ما هانعوزو
والسلام عليكم ورحمه الله وبركاته (تصفيق حاد بليز)
حب جارك قبل ما تحب تحب الوجود
ايه نصارى و مسلمين قال ايه و يهود
دى العبارة نسل واحد مـ الجدود
ليه يا مصرى كل أحوالك عجب
تشكى فقرك و أنت ماشى فوق دهب
مصر جنة طول ما فيها أنت يا نيل
عمر أبنك لم يعيش أبدا ذليل
((رحم الله الرائعيـــــــــــــن سيد درويش وبديع خيري))
وكأن من مصادفات القدر الجميلــــــه ان يكون احدهما مسلـــم والاخر مسيحي
وكأن لسان حالهما يقول لكل من تسول له نفسه افتعال الفتن:
اتعظــــــــــو يابقـــــــــــر
ملحوظه كلبوظه: والله العظيم تلاته انا فتحت المدونه وكنت ناويه ادي المجلس العسكري واحده فالعضــــــــــــل
معرفش ليه قلبت علي حوار اديان المهم يعني الف هنا وشفا علي حضراتكم
واتفضلو شـــــاي منعنــــع
ليست هناك تعليقات:
إرسال تعليق